MAGDALENA NG LANSANGAN

Bulgar, immoral, mababang lipad kung sila’y tawagain, mga kapit sa patalim, sila ang mga Magdalena sa lansangan o mga prostitute.

Ang prostitusyon bagama’t illegal ay isa na rin itong industriya sa ating bansa. Isa ito sa mga pinakamatandang propesyon sa buong mundo. Dito sa Pilipinas, kahit saan mo ibaling ang iyong paningin ay naglipala na ang mga bugaw at establisimento na humahakot ng pera dito.

Dahil sa labag sa batas ang prostitusyon ito ay pilit na sinusupil ng mga otoridad. Ngunit aminado rin ang mga may kapangyarihan na minsan ay hindi na nila nasusunod ang Standard Operating Procedure. Sa ganitong anggulo pa lamang ay pwede na nating masabi na may kapabayaang nagagawa ang ating mga kapulisan. Ayon sa S.O.P. sa paghuli ng mga prostitute ay bawal ang manakot at pag babae ang hinuhuli dapat rin ang huhuli ay babae o di kaya ay ang mag-sesecure. At naayon din sa Republic Act 9208 nakasaad ang anti-trafficking law o ang pantay na pagtrato maging anuman ang iyong antas sa lipunan.

Ang prostitusyon ay laganap na sa Pilipinas.Sa Quezon City pa lang ay humigit kumulang limang libo ang prostitute at ang ilan pa ay minor de edad, mula labing dalawang taong gulang. Matagal na rin itong sakit ng ulo ng pamahalaan na pilit na ipinagwawalang-bahala nila. Dahil sa sobrang kahirapan dito sa Pilipinas, kapit sa patalim, kung kaya’t pinasukan ang prostitusyon. Ngunit hindi rin ito nangangahulugan na nag-eenjoy ang mga prostitute sa kanilang trabaho dahil unti-unti nitong sinisira ang kanilang pagkatao at parang linalagyan ng putik ang kanilang mga mukha. Kung ating iisiping mabuti, hindi tama na ang mga prostitute lang ang huhulihin lagi ng mga may kapangyarihan, dapat ay kasali rin ang mga bugaw, establisimento, at ang mga bumibili nito. Ang mga prostitute ay mga biktima lamang, ang tunay na may sala ay ang mga nakakuha ng pera sa ginagawa ng mga Magdalena sa lansangan.